వీళ్లంతా బెంగళూరుకు మంచి భవిష్యత్ ఇచ్చే పనిలో పడ్డారు.. 

0


అది బెంగళూరు శివారులోని బన్నేరుఘట్ట ప్రాంతం ...

ఓ కుర్రాడు రోజూ చిన్న ఆటో తీసుకొచ్చి... 

అక్కడ పేరుకుపోతున్న చెత్తనంతా తీసుకెళ్తున్నాడు...

మొదటి రోజు అక్కడి జనాలంతా వింతగా చూశారు..‍ !

రెండు.. మూడు... ఐదు...పది.. నెల రోజులు దాటింది..

వారు అలా చూస్తూనే ఉన్నారు... 

ఆ కుర్రాడు చెత్త తీసుకెళ్తూనే ఉన్నాడు... ‍!

తర్వాత కాలనీ వాసులకు అలవాటయిపోయింది. 

తీస్తున్నాడు కదా అని ఇంకొంచెం చెత్త ఎక్కువే వేస్తున్నారు...

చదువుకుంటున్న ఆ కుర్రాడు చెత్త ఎందుకు తీస్తున్నాడు..?

మున్సిపాలిటీ వ్యాన్లు రాని కాలనీలో సర్వీస్ ఎందుకు చేస్తున్నాడు..?     

కాలనీ వాళ్లకు ఈ ఆలోచనే రాలేదు..

అలా ఎనిమిది నెలల పాటు జరిగింది..

తర్వాత ఆ కుర్రాడు ఆ కాలనీ వాళ్లకు కనిపించలేదు.

తర్వాత ఏం జరిగింది..?  

ఇది ఆరేళ్ల కిందటి నాటి మాట. ఇప్పుడు నాటి బన్నేరుఘట్టలో నివాసం ఉన్నవారు కొత్త ప్రాంతాలకు వెళ్తే...ఆ కుర్రాడే గుర్తుకు వస్తున్నాడు. ఎందుకంటే అతనిలానే ఇప్పుడు బెంగళూరులో పదిహేను వేల మంది యువకులు పనిచేస్తున్నారు. కాలనీల్లో పోగుపడిన చెత్తను తీస్తున్నారు... అవగాహన కార్యక్రమాలు చేపడుతున్నారు... ముఖ్యంగా రేపటి పెద్దలకు పర్యావరణ విలువను వివరిస్తున్నారు...

వారంతా "రీప్ బెనిఫిట్ సంస్థ" సభ్యులు. కాలుష్యం, నీరు, పర్యావరణ సమస్యలతో బెంగళూరు భవిష్యత్ పై పడుతున్న అనుమానాలను పటాపంచలు చేసేందుకు ఈ గ్రీన్ క్రూసేడర్స్ ప్రయత్నిస్తున్నారు.

ఒక్కడితో ప్రారంభం...

ఆరేళ్ల కిందట బన్నేరుఘట్ట ప్రాంతంలో చెత్త తీసిన యువకుడి పేరు కుల్దీప్ దంతేవాడియా. పర్యావరణంపై అమితమైన మక్కువ ఉన్న కుల్దీప్.. క్రిస్ట్ కాలేజీలో బిజినెస్ గ్రాడ్యుయేషన్ చదవుతున్నప్పుడే గార్బేజ్ సెక్టార్ లోనే పనిచేయాలని గట్టిగా నిర్ణయించుకున్నాడు. సమస్యను పూర్తి స్థాయిలో అర్థం చేసుకోడానికే ఎనిమిది నెలల పాటు 150 ఇళ్ల చెత్తను ఎత్తిపోశాడు. బెంగళూరు మున్సిపల్ కార్పొరేషన్ పరిధిలోకి రాని బన్నేరుఘట్టలో చెత్త ఎక్కడికక్కడ పేరుకు పోతూ ఉండేది. అందుకే ఆ ప్రాంతాన్ని కుల్దీప్ ఎంచుకున్నాడు. అసలు సమస్యలేమిటో తెలుసుకున్నాడు.

"ఎనిమిది నెలల పాటు చెత్త తీస్తూనే సమస్యకు మూలమేమిటో తెలుసుకునే ప్రయత్నం చేశాను. రెండు అంశాలు నాకు కనిపించాయి. ఒకటి మనుషుల మనస్తత్వం...రెండు ఈ సమస్యకు ఉన్నపళంగా పరిష్కారం దొరికే చాన్స్ లేదని గుర్తించడం.." కుల్దీప్ దంతేవాడియా

ఈ అనుభవంతనే కుల్దీప్ దంతేవాడియా తనలాంటి ఆలోచనలే ఉన్న మిత్రులు గౌతమ్ ప్రకాష్, కమల్ రాజ్ లతో కల్సి 2011లో "రీప్ బెనిఫిట్" అనే సంస్థను ప్రారంభించారు. ప్రధానంగా గార్బేజ్ పై దృష్టిపెట్టినా... వాటర్, శానిటేషన్ ఇష్యూలను కూడా పరిష్కరించందుకు పయనం ప్రారంభించారు. ఇప్పుడు రీప్ బెనిఫిట్ లో పదిహేను వేల మంది సభ్యులున్నారు. అందరూ స్థానిక పర్యావరణ సమస్యలను పరిష్కరించేందుకు కొత్త కొత్త పద్దతుల్లో ప్రయత్నాలు చేస్తున్నారు.

మార్పు కోసం నిరంతర ప్రయత్నం

రీప్ బెనిఫిట్ లోని గ్రీన్ క్రూసెడర్స్ అంతా తాము ఫీల్డ్ పనిచేయడానికే పరిమితం కావడం లేదు. యువతను, స్కూలు విద్యార్థులను చైతన్య పరిస్తే సమస్య మూలాల నుంచి పరిష్కారం లభిస్తుందని వీరు గట్టిగా నమ్ముతున్నారు. అందుకే యువతను, చిన్న పిల్లలను తమ కార్యక్రమాల్లో కలుపుకునేందుకు విస్తృతంగా ప్రయత్నిస్తున్నారు. వారే సొంతంగా గ్రీన్ సొల్యూషన్స్ ను సూచించేలా ప్రొత్సహిస్తున్నారు. వీరి ప్రయత్నాలతో మెరుగైన పర్యావరణం కోసం సమష్టి కృషి జరుగుతోంది. ఇప్పటికే రీప్ బెనిఫిట్ సంస్థ నీరు, డ్రైనేజీ సహా ఇతర సమస్యలున్న చాలా ప్రాంతాల్లో వినూత్నమైన పరిష్కార మార్గాలను చూపారు.

అందులో కొన్ని...

1. లోకాస్ట్ గ్రే వాటర్ హార్వెస్టింగ్ సిస్టమ్స్ :

ఓ స్కూల్లో వివిధ అవసరాలకు రోజుకు 120 లీటర్లనీరు వాడతారనుకుందాం. వాటిలో దాదాపు 70, 80 లీటర్ల వరకు ఈ గ్రే వాటర్ హార్వెస్టింగ్ సిస్టమ్ ద్వారా రీసైకిల్ చేసుకోవచ్చు. ఈ రీసైక్లింగ్ నీటిని టాయిలెట్స్ ను క్లీన్ చేయడానికి, ఫ్లషింగ్ చేయడానికి, స్కూల్ గార్డెన్ లో మొక్కలకు పోయడానికి ఉపయోగించవచ్చు. ఇలా ఏడాదిలో ఒక్క స్కూలే 30వేల లీటర్ల నీటిని రీసైక్లింగ్ చేస్తోంది.

2. నీళ్లు అవసరం లేని టాయిలెట్స్:

ఉపయోగంలో లేని ఇరవై లీటర్ల వాటర్ క్యాన్లతో నీళ్లు అవసరం లేని టాయిలెట్స్ కు రూపకల్పన చేశారు. దుర్వాసన, పారిశుద్ధ్య సమస్యలు రాకుండా ఇవి బాగా ఉపయోగపడుతున్నాయి. నీటి కొరత తీవ్రంగా ఉన్న పాఠశాలల్లో వీటిద్వారా సత్పలితాలు వస్తున్నాయి.

3. చెత్తను సులువుగా వేరు చేసే బిన్స్:

హైదరాబాద్ లో తడిచెత్త, పొడిచెత్త వేయడానికి వేర్వేరుగా ప్లాస్టిక్ బక్కెట్లను సరఫరా చేసింది తెలంగాణ ప్రభుత్వం. ఇలాగే రీప్ బెనిఫిట్ కూడా రీసైకిల్ చేయగలిగే వ్యర్థాలు, రీసైకిల్ చేయలేని వ్యర్థాలను వేరు చేసేలా ట్రాన్సపరెంట్ బిన్స్ ను పరిచయం చేసింది.

అయితే ఇలాంటి ఖర్చు లేని పద్దతుల వల్ల మాత్రమే పర్యావరణం మెరుగుపడదని గ్రీన్ క్రూసెడర్స్ కి తెలుసు. అందుకే రీప్ బెనిఫిట్ ప్రత్యేకమైన ప్రణాళికతో ముందుకెళ్తోంది. పర్యావరణ పరిరక్షణ ఆవశ్యతపై స్కూలు పిల్లల్లో ఆవగాహన పెంచుతోంది. తాత్కాలికంగా ఇలాంటి పద్దతులు ప్రయోజనం కలిగిస్తాయి. కానీ లాంగ్ రన్ లో మాత్రం కచ్చితంగా మనుషుల్లో వచ్చే మార్పే సమస్యకు పరిష్కారం చూపిస్తుందని కుల్దీప్ అంటున్నారు.అందుకే స్కూళ్లలో, కాలేజీల్లో యువతకు గేమిఫికేషన్ ద్వారా ఆసక్తి కలిగేలా కార్యక్రమాలు చేపడుతున్నారు.

"మా పరిశీలన ప్రకారం నాలుగు రకాల మనుషులున్నారు. వారు సమస్య పరిష్కారానికి సీరియస్ గా ప్రయత్నించేవారు, సామాజిక బాధ్యతగా భావిచేవారు, సరదా కోసం, ఏదైనా సాధించాలని భావించేవారు. వీరందరితో ఎక్కడో ఒక చోట నుంచి సమస్య పరిష్కారానికి పని ప్రారంభించడం ముఖ్యం" కుల్దీప్, రీప్ బెనిఫిట్ ఫౌండర్

గేమిఫికేషన్ అనే కొత్త కాన్సెప్ట్ తో ఇప్పటికే 15 సెషన్లు నిర్వహించారు. గంటా, గంటన్నర మధ్యలో చెత్త, ఎనర్జీ, శానిటేషన్ తదితర అంశాలపై యాక్టివిటీస్ నిర్వహిస్తున్నారు. గేమిఫికేషన్ ను నాలుగు అంచెల్లో నడుపుతారు. పిల్లందర్నీ భాగస్వాముల్ని చేస్తారు.

1. స్థానిక సమస్యను గుర్తించడం ( Discover )

2. ఆ సమస్యవల్ల కలిగే అనర్థాలను అంచనా వేయడం ( Investigate )

3. స్థానికంగా దొరికే వాటితోనే పరిష్కారాలు కనుగొనడం ( Solve )

4. ప్రాసెస్ మొత్తాన్ని వీలైనంత మందితో చర్చించి గ్రీన్ హ్యాబిట్ ను పెంచుకునేలా చేయడం ( Communicate )

ప్రొత్సాహకర ఫలితాలు...

గేమిఫికేషన్ కాన్సెప్ట్ మంచి ఫలితాలను ఇస్తోందని కుల్దీప్ సంతోషం వ్యక్తం చేస్తున్నారు. రీప్ బెనిఫిట్ కు చెందిన గ్రీన్ క్రూసేడర్స్ ఇప్పటికే అనేక చోట్ల పేరుకుపోయిన 200 టన్నుల చెత్తను తొలగించారు. ఏడాదికి 15లక్షల లీటర్ల నీటిని, 63వేల కిలోవాట్ల విద్యుత్ ను ఆదా చేస్తున్నారు. 110 స్కూళ్లు, ఇనిస్టిట్యూషన్స్ తో కలసి పనిచేస్తున్నారు. 30 కార్పొరేట్ కంపెనీలు వీరికి సాయమందిస్తున్నాయి. ఇప్పటి వరకు చేసిన ప్రయత్నానికి ఇక ముందు టెక్నాలజీ టచ్ ఇద్దామని నిర్ణయించుకున్నారు కుల్దీప్. అన్ని ప్రాంతాల ప్రజలకు తమ స్థానిక సమస్యలను పరిష్కరించునేందుకు సాయం చేసేలా ఓ అప్లికేషన్ ను రెడీ చేస్తున్నారు.

చదువులు పూర్తయ్యీ, పూర్తవ్వకముందే కెరీర్ పోరాటంలో పడిపోయే యువత పర్యావరణ పరిరక్షణే తమ భవిష్యత్ గా ఎంచుకుని పనిచేస్తున్నారు. వీరి ప్రయత్నం బెంగళూరుకు కచ్చితంగా వరంగా మారుతుందనడంలో సందేహం లేదు. 

As an IT engineering graduate... i am passionate to know about new and innovative ideas and explore them.....

Related Stories