గ్రామాల్లో విదేశీ పంటలతో లాభాల పంట

ఓ చిన్న పల్లెలో విదేశీ కూరగాయలుఎకరాల కొద్దీ సాగవుతున్న అనేక రకాలుఓ పార్సెల్‌లో వచ్చిన విత్తనాలతో వినూత్న ఆలోచనరిలయన్స్‌కి సరఫరా చేసే స్థాయికి ఎదిగిన ఓం ప్రకాష్

0

హిమాచల్ ప్రదేశ్‌లోని కిన్నౌర్ జిల్లా అది. లాహౌల్ అండ్ స్పిటికి వెళ్లే దారిలో మధ్యలో తరచుగా అక్కడే ఆగుతుంటారు యాత్రీకులు. చూడచక్కని కోలముఖం, కిన్నౌరి సాంప్రదాయ టోపి ధరించిన 69ఏళ్ల వృద్ధుడు ఓమ్ ప్రకాష్. అయితే జీవితపు చిత్రాల్లో భాగంగా ప్రపంచం ఆయన దగ్గరకే వస్తోంది.

కనీసం వారానికోసారైనా తన కుమారుడి యాపిల్ తోటలోని ప్రకాష్ రీజెన్సీ హోటల్‌కు వస్తారు ప్రకాష్. అది కూడా మెయిల్ చెక్ చేసుకునేందుకే. అలాగని ఆయనకేం బోలెడు మెయిల్స్ రావు. హోటల్‌కి వచ్చినవాళ్లతో ఆయన స్నేహంగా మెలగడంతో.. వాళ్లలోచాలమంది పోస్ట్ కార్డులు, ఎన్వలప్‌ల వంటివి పంపుతుంటారు. ఓంకు ప్రపంచం నలుమూలలనుంచి ఉత్తరాలు వస్తుంటాయి. జర్మనీ, స్వీడన్, న్యూసౌత్ వేల్స్, బర్మింగ్‌హామ్... ఇలా అనేక ప్రాంతాల నుంచి పిల్లలు, పెంపుడు జంతువులు, నివాసముండే ఇళ్ల ఫోటోలు వస్తుంటాయి. వాటిలో కొన్నింటిలో ఓం ప్రకాష్ భుజాలపై చేతులు వేసి టూరిస్టులు దిగిన ఫోటోలు కూడా ఉంటాయి. ఒకసారి ఓ అతిథి అయితే ఓం ఫోటోలతో ఓ కేలండర్ డిజైన్ చేసి పంపించాడు. అయితే ఈయనకు ఇంగ్లీష్ మాట్లాడ్డం రాదు. కొంత చదవగలరంతే. అయితే ఓం ఆ ఉత్తరాలను ఎంతో ఆరాధనగా దాచుకుంటారు.

ఓమ్ ప్రకాశ్
ఓమ్ ప్రకాశ్

ఇష్టపడే మరో విషయం అనేక ప్రాంతాల నుంచి స్నేహితులు పంపిన విత్తనాల ప్యాకెట్లు. ప్రతీ వాటిని యాపిల్ చెట్ల పక్కనో, చుట్టూరానో శ్రద్ధగా పాతుతారాయన. ఇలా అనేక సంవత్సరాలనుంచి చేస్తుండడంతో ఆస్పారగస్, బ్రోకోలి, చైవ్స్ వంటి ఐరోపా కూరగాయలు ఆయన తోటలో దర్శనమిస్తాయి. ఓం ఉన్న గ్రామంలోని వ్యక్తులకు అవేంటో తెలీదు. వాటినెవరూ తినరు కూడా.

రచయితకి ఓం పరిచయమయ్యే సందర్భం

చల్లని జూన్ నెలలో నా రూమ్ బాల్కనీలోంచి మొదటిసారి నేను అతన్ని చూశారు. ఆ సమయంలో హిమాలయాల ఎదురుగా నుంచుని ఉదయపు గాలిని ఆస్వాదిస్తున్నానా సమయంలో. ఆ సౌందర్యం చూస్తున్న నాకు అంతకంటే అద్భుతంగా కనిపించిన విషయం... రకరకాల మొక్కలు, చెట్ల అందాన్ని ఆరాధనగా చూస్తున్న ఓం ప్రకాష్. ఎర్రగా మాగిన స్ట్రాబెర్రీలను తన చేతులతో అతి సుతారంగా తెంపుతున్నాడా వృద్ధుడు. పక్కనే పచ్చికపై ఉన్న బకెట్‌లో ఒక్కొక్కటిగా వేస్తున్న దృశ్యం నాకు కనులవిందు చేసింది. అదే సమయంలో పసుపుగా మారిన ఆకులను వేరు చేస్తున్నారు. ఆతని దగ్గరకు వెళ్లాలనిపించి వస్తున్న ఆవులింతలు ఆపుకుంటూ. జాకెట్ ధరించి బయల్దేరాను. ఓం అక్కడి నుంచి వెళ్లిపోయేలోపే చేరుకున్నాను కూడా.

నేనా యాపిల్ తోటకు చేరే సమయానికి ఆశ్చర్యకరంగా నాకోసం ఎదురుచూస్తున్నారు ఓం. కొత్త స్నేహానికి స్వాగతం పలుకుతున్నట్లు ఒక పెద్ద స్ట్రాబెర్రీని తన చేతులతో స్వయంగా అందించారు. నేను కూడా పహాడీనే అంటూ మాటలు కలిపారు. పక్కనే గుత్తులు గుత్తులుగా కాచి ఆకుపచ్చగా మెరిసిపోతున్న ఆస్పారగస్‌ తోట దగ్గరకు తీసుకెళ్లారు.

“మీకు ఆస్పారగస్ తెలుసా?” ఇలా ఓం అడిగిన ప్రశ్న చిన్నపిల్లాడు అడుగుతున్నట్లుగా అనిపించింది. అలాగే బురద చేతులతోనే పట్టుకుని నాకు చూపించేందుకు ఒక కట్ట పైకి తీశారు. నాకు తెలుసని చెప్పగానే వెంటనే కొన్నింటిని కిచెన్‌కు పంపించి... ఆరోజు వాటినే వండమని చెప్పేసరికి ఆశ్చర్యపోయాన్నేను. ఎందుకంటే ఆస్పారగస్‌ని గుర్తించేవాళ్లను చాలా తక్కువమందిని చూశారాయన. ఓ యాపిల్ చెట్టుకింద కూర్చుని బాతాఖానీ మొదలుపెట్టాం మేం. అప్పుడు బ్రోకోలి, చైవ్స్, జుచ్చిని, ఆస్పారగస్‌లు ఈ కుగ్రామానికి ఎలా వచ్చాయో చెప్పడం ప్రారంభించారు ఓం ప్రకాష్. ఆయన నోటితోనే విని ఉండకపోతే నేనసలు ఇదంతా నమ్మేదాన్ని కాదు కూడా.

గతంలో ఓం ఏం చేసేవారు ?

హిమాచల్ ప్రదేశ్ ప్రభుత్వ జంతు సంరక్షణ విభాగంలో పనిచేసిన ఓం ప్రకాష్ ఓ యాపిల్ పండ్ల రైతు. 17 ఏళ్ల క్రితం ఓ ఆస్ట్రేలియా వాసి ఇక్కడకు వచ్చి నివాసం కోసం ఇబ్బంది పడుతున్నాడు. "ఆసమయంలో సంగ్లాలో ఎక్కువగా హోటల్స్ ఉండేవి కావు. దీంతో ఆయనకు హోటల్ రూమ్ దొరకలేదు. నేనప్పుడు అతన్ని నా ఇంటికే తీసుకెళ్లాను. ముగ్గురు పిల్లలతో కలిసి జీవించేవాడిని ఆ సమయంలో. అతని పేరు రాబర్ట్ రిచీ. అతను కూడా రైతే కావడం విశేషం. ఓం తోటంతా తిరిగి చూసిన రాబర్ట్ ముగ్ధుడైపోయాడు. పీచ్, ప్లమ్, పీర్‌లతో పాటు కేబేజ్, కేలిఫ్లవర్ వంటి కూరగాయలను పండించడం చూసిన ఆ ఆస్ట్రేలియా రైతు.. ఇలాంటి వాతావరణ పరిస్థితుల్లో చక్కగా పండే ఆస్పారగస్‌ను నాటాలంటూ సలహా ఇచ్చాడు.

ఆస్పారగస్ ఎలా వచ్చింది ?

ఓం కానీ అతని కుటుంబ సభ్యులు కానీ ఆస్పారగస్ పేరు ఎప్పుడూ వినలేదు. దీంతో ఆ విత్తనాలు పంపుతానని రాబర్ట్ వాగ్దానం చేశాడు. "అతను చెప్పినపుడు నేను సీరియస్‌గా తీసుకోలేదు. అయితే కొన్ని రోజుల తర్వాత న్యూ సౌత్ వేల్స్ నుంచి నాకో పార్సెల్ వచ్చింది. అందులో ఈ విత్తనాలున్నాయి. వాటిని రాబర్ట్ రిచీ పంపించాడని అర్ధమైంద"ని చెప్పారు ఓం ప్రకాష్.

రెండేళ్ల తర్వాత రిచీ మరిన్ని విత్తనాలతో మళ్లీ మన్నౌరి వచ్చారు. వాటిని కూడా ఎంతో శ్రద్ధగా నాటారు ఓం. ఐదేళ్ల తర్వాత ఓం తోటలో ఆస్పారగస్‌తోపాటే మరిన్ని విదేశీ మొక్కలు చేరుకన్నాయి. వాటి విత్తనాలను, మొక్కల అంట్లను ఇతర రైతులకు ఇవ్వడం మొదలుపెట్టారు. అయితే వారెవరూ శ్రద్ధ కనపరచడం లేదని చెప్పారు ఓం. భాక్సేరి, రాక్సమ్, కిల్బాల్లో ఓ 13మంది రైతులు మాత్రం ఇప్పటికీ ఆస్పారగస్ సాగు చేస్తుండడం విశేషం.

ఓసారి ఢిల్లీ వెళ్లిన సమయంలో.. పోష్ ఖాన్ మార్కెట్‌లో ధైర్యం చేసి ఓ వ్యాపారిని ఆస్పారగస్ కొనుగోలు చేయాలని అడిగారు. కిన్నౌర్ జిల్లా వ్యక్తి ఆ మాట అడగడంతో ఆశ్చర్యపోయిన ఆ అమ్మకందారుడు.. దాని నాణ్యత చూసి ముగ్ధుడైపోయాడు. మరిన్ని తెచ్చినా కొంటానంటూ ప్రోత్సహించాడు. ఆస్ట్రేలియా, న్యూజిలాండ్‌ల నుంచి ఆస్పారగస్‌ని దిగుమతి చేసుకుంటున్నారని అప్పుడు ఓంకి అర్ధమైంది. వ్యాపార అవకాశం ఉందని తెలుసుకున్న ఓం.. ఆ వార్తను గ్రామంలోనూ, తన రైతు మిత్రులతోనూ పంచుకున్నారు.

పెంచడం ఎలా ?

"ఆస్పారగస్ పెంచడం అంత సులభం కాదం"టారు ఓం. ఆ మొక్కకి ఏడాది వయసొచ్చేనాటికి మొత్తం ఎండిపోయి మొదలు మాత్రమే మిగులుతుంది. మరో ఏడాదికి అది పంట రూపానికి చేరుతుంది. ఈ మొక్క విత్తనాన్ని భూమికి నాలుగు అంగుళాల లోతులో పాతాల్సి ఉంటుంది. ఒక్కో మొక్కకు మధ్య దూరం ఒకటిన్నర అడుగు ఖచ్చితంగా ఉండాలి. దాదాపు 3-4 ఏళ్లు పడుతుంది పంట చేతికందడానికి. "అంతే ఆ తర్వాత వెనక్కి తిరిగి చూసుకోనక్కర్లేదు. ఆరంగుళాల చొప్పున కట్ చేసుకుంటూ వెళ్లినా.. మళ్లీ తిరిగి పెరుగుతుంది" - ఓం ప్రకాష్

ఆస్పరాగస్ మొక్కలు
ఆస్పరాగస్ మొక్కలు

విదేశీ స్పెషల్ వంటకం

"విదేశీయులెవరైనా మా అబ్బాయి నడిపే హోటల్‌కి వచ్చినపుడు ఆస్పారగస్‌తో చేసిన వంటకాలు వడ్డిస్తాం. దీంతో వారు సంతోషపడతారు. యూరోప్ నుంచి ఈ విత్తనాలు వచ్చాయని చెప్పినపుడు వాళ్ల ఆనందం రెట్టింపవుతుందం"టారు ఓం ప్రకాష్. 

హోటల్‌కి వచ్చిన అతిథులు రిటర్న్ గిఫ్టులుగా ఆయా దేశాల నుంచి విత్తనాలు పంపడం ప్రారంభించారు. ఓం సంతోషంగా వాటిని స్వీకరించి ఎంతో జాగ్రత్తగా నాటి పండిస్తుంటారు. పండించే విషయంలో ఏదైనా అనుమానమొస్తే వారిని సంప్రదించేందుకూ ఏమాత్రం సంకోచించరాయన. ఇజ్రాయిల్ నుంచి వచ్చిన బ్రోకోలి, టొమాటోలు, స్విట్జర్లాండ్ నుంచి వచ్చిన జచ్చిని, గుమ్మడికాయ, జెర్మనీ-నెదర్లాండ్స్ నుంచి వచ్చిన ఆస్పారగస్, బర్మింగ్‌హామ్ నుంచి వచ్చిన చైవ్స్, అలాగే డెన్మార్క్‌కు చెందిన ఆస్పారగస్ కూడా ఇప్పుడాయన తోటలో కనిపిస్తాయి.

కిన్నౌర్ నుంచి ఢిల్లీకి కార్పొరేట్ రూట్

2016నుంచి ఆస్పారగస్ వాణిజ్య అమ్మకాలు ప్రారంభించేందుకు ఓం సన్నాహాలు చేసుకుంటున్నారు. ఢిల్లీ, చండీఘడ్‌లలో రిలయన్స్ ఔట్‌లెట్ల ద్వారా ఈ విక్రయాలు జరగనున్నాయి. ఓం, ఇతర రైతులు ఓ సహకార సంఘం ఏర్పాటు చేసుకుని.. బస్ ద్వారా రాత్రికి చండీఘడ్‌కు పంపితే.. తెల్లారేసరికి ఢిల్లీకి వెళ్లేలా ప్రణాళికలు రచించారు. అయితే డబ్బు సంపాదన తనకు ప్రాధాన్యత కాదని చెబ్తారు ఓం. 

“సంగ్లా గ్రామం గురించి అందరికీ తెలియాలి. ధనిక కుటుంబాలతో సహా అందరూ అస్పారగస్‌ను రుచి చూడాలి. అయినా సరే నేనిప్పటివరకూ దాన్ని తినలేదం”టారు ఓం ప్రకాష్. 

ఇదంతా చెప్పి చిన్నారిలా ఆనందం వ్యక్తం చేసిన ఆయన.. ఓ కట్ట ఆస్పారగస్‌‍లు తీసుకుని కిచెన్‍‌లోకి వెళ్లిపోయారు. నాకు చూపించేందుకు తీసుకొచ్చిన ఉత్తరాలు, ఫోటోలన్నీ జాగ్రత్తగా తన రూమ్‌లో భద్రపరచుకున్నారు. ఆయన తెంపిన స్ట్రాబెర్రీలు కొత్త అతిథులకు బహుమతిగా ఇచ్చేందుకు హోటల్ రూం రిసెప్షన్‌కు చేరుకున్నాయి.

ఓం పొలంలో పండిన రుచికరమైన స్ట్రాబెర్రీలు
ఓం పొలంలో పండిన రుచికరమైన స్ట్రాబెర్రీలు

అయితే ఆస్పారగస్ విషయంలో మాత్రం చాలా ప్రత్యేకతలు తీసుకుంటారు ఓం ప్రకాష్. 7,400చదరపు మీటర్లు, 4వేల చదరపు మీటర్లలో రెండు తోటలుగా ఇప్పటికీ ఆస్పారగస్ దర్శనమిస్తాయి. ఇది మొదలైంది బహుమతిగా వచ్చిన ఓ చిన్న విత్తనాల పార్సెల్‌తో అంటే ఆశ్చర్యం వేయక మానదు.

అతిధి రచయిత గురించి : రెండు దశాబ్దాలకు పైగా రచనలు చేస్తున్న రచనా బిష్ట్.. సునిశితంగా పరిశీలించి మరీ అసాధారణ విషయాలు అందిస్తుంటారు. ఆమె కామన్‌వెల్త్ షార్ట్ స్టోరీ పోటీల్లో విజేత కూడా(మున్నీ మౌసీ అనే తన మొదటి స్టోరీకే ఈ బహుమతి దక్కింది. తాజాగా పెంగ్విన్ అనే పేరుతో మొదటి బుక్ పబ్లిష్ అయింది కూడా. ‘ది బ్రేవ్ -పరమ్ వీర్ చక్ర’ అవార్డ్ పొందిన ఓ సైనికుని భార్య అయిన రచనా బిష్ట్‌ 13 ఏళ్ల చిన్నారికి తల్లి కూడా.